حكايات عم خليل الحكايه الاولي

حكايات عم خليل..الحكاية الاولى
_ اتفضل يا سيدي أحلى فنجان قهوة لأحلى جدو خليل في الدنيا .
كنت قاعد في البلكونة بشم هوا وبسرح في ذكريات حياتي .. سمعت من ورايا صوت اسماء حفيدتي الكبيرة .
دخلت عليا بفنجان القهوة المخصوص بتاعي هي عارفه ميعاده من قبل ما اطلبه منها حطت الفنجان قدامي وفضلت واقفة شوية بصيت لها دقيقة وانا بحاول اكتم ابتسامتي قدامها وبتظاهر اني مكشر بس لما حسيت ان العفاريت كلها جم وواقفين وراها مقدرتش اداري اكتر من كدا وقولت بابتسامة عريضة
_ كنت متأكد ان البصة الطويلة دي وراها حاجة .. وبعدين قولي للعفاريت اني مش هحكي حاجة النهاردة لاني زعلان منهم وهم عارفين ليه.

بعد ما خلصت كلامي لقيت احفادي ال ٦ بيضحكوا وبيجروا عليا بمرح وبيحضنوني وكل واحد فيهم بيبوسني من خدي.. ضحكت وانا بحضنهم اكتر قربت مني اسماء وهي بتقول 
_ يا سلام على الحب يا سلام .. طبعا مش هينوبني من الحب جانب .. كبرت بقى خلاص .. متنساش دا انا اول واحدة في احفادك .. قصدي العفاريت زي ما بتقول .
فتحت دراعاتي لاسماء حضنتها وانا ببوس راسها وبطبطب عليها شاورتلهم بايدي انهم يقعدوا قدامي .. قولتلهم بعد ما اترصصوا قدامي 
_ كدا خلاص مش زعلان .. اوعوا بعد كدا تيجوا ومتسلموش عليا اول واحد .. ربنا عالم يا حبايبي انا بحبكوا قد ايه .. وبستنى اليوم اللي تيجوا فيه علشان نقعد مع بعض القعدة الحلوة دي .. طبعا زي ما انتوا عارفين اني مبقتش قادر امشي على رجلي وبقيت قعيد .. ايه متضايقين ليه .. عايزكوا تفهموا حاجة وتحطوها حلقة في ودناكم .. بعد العسر يسر .. وبعد الكرب فرج .. وبعد الحزن فرح .. وبعد الشدة والتعب راحة .. وفوق ده كله .. بعد صبرك على اي ابتلاء من ربنا سبحانه وتعالى الجنة ونعيمها .. المقصود من كلامي ان اي تعب او فقر ده رزق كبير من ربنا لازم تحمدوه عليه واوعوا تقولوا ليه يارب عملت كدا .. ده معناه انك مش راضي باللي قسمهولك وده بداية شرك بيه والعياذ بالله .. الحدوتة اللي هحكيهالكم النهاردة لازم تاخدوا منها عظة وعبرة .. ودي حصلت لصاحبي وجاري من سنين طويلة .. ها جاهزين تسمعوا .
كلهم بصوت واحد بمرح  
_ جاهزين .
وبدأت احكيلهم حكاية فتحي جاري واللي كان يوم من الايام صديق عمري.
من سنين طويلة جدا..
في يوم صحيت من النوم على صوت زغاريط لما فتحت عيني لقيت مراتي بتدخل الاوضة وبتجيب عباية من الدولاب لما شوفتها قولتلها وانا بتاوب 
_ في ايه يا فوزية .. ايه الهيصة دي.
قالتلي وهي بتلبس العباية السودة  
_ البت حسنات جابت توأم بسم الله ما شاء الله .. قوم يلا اغسل وشك وتعالى بارك لفتحي صحبك.. انا هروح اباركلها وارمي نقطة على العيال .. وانت ابقى حصلني .
حسنات تبقى مرات فتحي خبر كان جميل خصوصا انها كانت تعبانة طول فترة الحمل قمت من على السرير وبعد ما دخلت الحمام ولبست ..روحت لفتحي اللي اول ما شوفته خدته بالحضن وباركتله لكنه مكنش مبسوط.. وقابل كلامي وابتسامتي بشرود وهزات خفيفة من راسه بتدل انه بالفعل مكنش مبسوط!!.
حسيت بكدا بس مردتش اساله عن السبب خصوصا انه دايما هو واهل مراته بيتخانقوا وعلى خلاف طول الوقت وهم ساكنين جنب البيت اللي احنا ساكنين فيه علشان كدا رجحت ان ممكن ده يكون السبب بس لما دخلت علشان اشوف العيال وارمي عليهم نقطة عرفت هو ليه زعلان واكتشفت لواهلة وفي اللحظة دي صدق ظني لما قولت في بالي من سنتين كما تدين تدان يا فتحي .
انا اقولكم حصل ايه من سنتين وايه اللي شوفته خلى فتحي زعلان اوي بالشكل ده من حوالي سنتين وشوية كان لسه فتحي اعذب وانا يا دوب كنت لسه متجوز فوزية كان قاعد لواحده في شقته وقعدتنا انا وهو دايما بتبدأ بعد نص الليل نقعد عنده في البلكونة ونفضل نتكلم ونرغي لحد الصبح طبعا القعدة مكنتش كدا بس ربنا يسامحنا ويغفرلنا .. كنا بنشرب حاجة