اكونت فيك
انت في الصفحة 1 من 6 صفحات
ما تبعتي صورتك بقا عايزة اشوفك
لما اطمن الأول انك بنت وعشان اطمن ابعتيلي ريكورد بصوتك
قلبي وقف اول ما شوفت الرسالة هبعتلها ريكورد ازاي اكيد هتعرف اني ولد من صوتي
الموضوع بدأ معايا ب اكونت fake زهرة الامل أول اسم اكونت عملته في الحقيقة الاكونت دا عملته عشان اشتغل بيه صحابي لان انا عارف انهم مش لاقيين واحدة تبصلهم وأنا لو بنت والله كنت تفيت عليهم عملت الاكونت وبدأت اشتغلهم واحد واحد وطبعا ب اسامي مختلفة و دا اللي كان بيحصل
اه طبعا بحبك يا هيما هو انا ليا غيرك
اوعي تكوني بتكلمي حد غيري
وحياتك عندي ما اعرف حد غيرك
بحبك
انا مش مصدق اخيرا في حد معجب بيا انا
هو انت قليل ولا ايه يا دوومي دا انا اول ما شوفتك وقعت علطول مستحملتش وجيت كلمتك
بس اوعي تكوني بتكلمي حد غيري
وحياتك عندي ما حصل
كنت مبسوط بصراحة وانا بلعب عليهم كدا الموضوع موقفش عند صحابي وبس الشيطان بدأ يلعب معايا اني العب مع ناس جديدة ومش لازم اكون عارفهم بالفعل عملت اكونت جديد وسميته أميرة بحجابي بدأت ادخل في جروبات كتير واتكلم ومع اول كومنت ليا لقيت
الله بجد اسلوب حضرتك راقي جدا انا سامي حسن للدردشة ينفع ندردش شوية لو معندكيش مانع
طب ايه بقا مش هتقوليلي اسمك ايه
وانت شايف ايه
بس أميرة بحجابي دا مش اسم
امال مهنة يعني ولا ايه
لا قصدي انه مش الاسم الحقيقي
في الحقيقة الموضوع ممتع اوي انا مش مريض ولا انا بنتقم من حد هو مجرد مقلب بسيط بس هل تفتكر ان الموضوع هيقف عند كدا الشيطان مستمر في اقناعي بالمزيد وانا برضو مستمر بدأت ابعت ادد عشوائي ببعت لأي حد قدامي وبعد ما كنت ببعت الادد ب 5 دقايق كان بيتقبل و دا كان شكل الرسايل عندي
انا حاسس اني اعرفك من زمان
من ساعة ما شوفت اسمك وانا حسيت ب راحة غريبة وعشان كدا قبلت الادد ممكن نتكلم شوية
مدينة الفيوم ترحب بك وبما انك من الفيوم زيي وطلعنا ولاد بلد واحدة انا في خدمتك لو احتاجتي اي حاجة
تعبت من كتر الكلام والرد قررت اقفل دلوقتي وابقا اكمل الصبح لسة هقفل الفيس جالي اشعار
تم قبول طلب صداقتك من ليلى أسامة
بس انا مبعتش
